رخصة النشر (Syndication)12 مارس 2008 - 16.18:04
أحمد فؤاد نجم
شيد قصورك
شيد قصورك ع المزارع
من كدنا وعمل إدينا
والخمارات جنب المصانع
والسجن مطرح الجنينه
واطلق كلابك
في الشوارع
واقفل زنازينك
علينا
وقل نومنا في المضاجع
ادي احنا
نمنا ما اشتهينا
واتقل علينا بالمواجع
احنا اتوجعنا
واكتفينا
وعرفنا
مين سبب جراحنا
وعرفنا روحنا
والتقينا
عمال وفلاحين
وطلبه
دقت ساعتنا
وابتداينا
نسلك طريق
ما لهش طريق
ما لهش راجع
والنصر قرب من عنينا
النصر أقرب
من إدينا